Vier beseer in N2-ongeluk
2012-02-15 22:55
Johannesburg – Twee mense veg om hul lewens en twee ander is ernstig beseer nadat hul motor gerol het op die N2 suid naby Queen Nandi-rylaan, Durban, het paramedici gesê.
Volgens Chris Botha, woordvoerder van Netcare 911, het twee motors in die suidelike rigting gery toe een motor teen die agterkant van die ander vasgery en omgeslaan het.
“Paramedici van Netcare 911 en nooddienswerkers het op die toneel gevind dat ‘n Toyota Yaris met vier insittendes van die baan wat suid ry na die baan wat noord ry gerol het. Die wrak van die voertuig het in die baan wat noord ry tot stilstand gekom, nadat die vier insittendes daaruit geslinger is.”
Twee mans en een vrou is ongeveer 50 meter van die wrak af gevind, terwyl nog ‘n vroulike pasiënt onder die motor vasgekeer was. Nadat die beseerdes ondersoek is, is bepaal dat twee van hulle kritieke beserings opgedoen het. Die ander twee het ernstige beserings opgedoen.
Die twee pasiënte wat kritiek beseer is, is op die toneel aan asemhalingstoestelle gekoppel. Hulle is na ‘n nabygeleë hospitaal geneem nadat hulle gestabiliseer is.
- Volg Nuus24 op Twitter
- Nuus24