Vier beseer in Durban-ongeluk
2009-12-13 11:53
Durban – Vier mense is beseer, twee ernstig, toe die Toyota Tazz waarin hulle gery het teen ‘n Audi A4 gebots het. Die ongeluk het Sondag op die N2 naby Higginson-hoofweg gebeur, het Durban paramedici gesê.
Volgens Jeffrey Wicks, Netcare 911-woordvoerder, het albei motors glo in dieselfde rigting gery en het die Audi agter in die Tazz vasgery.
“Die Toyota Tazz het die pad verlaat en verskeie kere gerol voordat dit in ‘n stormdrein langs die pad tot stilstand gekom het.”
Die beseerde bestuurder en drie passasiers moes uit die voertuig gehaal word en is na die hospitaal geneem vir verdere behandeling.
“Die Audi A4 het gerol en op sy dak in die middel van die pad tot stilstand gekom. Die bestuurder is gelukkig om ongedeerd daar uit te kom en is met polisiebegeleiding in ‘n ambulans na die hospitaal geneem,” het Wicks gesê.
- Sapa