Vier aangekeer ná moord op regeringsamptenaar
2013-01-02 17:08
Johannesburg – Drie tieners en 'n man is in hegtenis geneem in verband met die moord op 'n senior regeringsamptenaar van Limpopo, het die polisie Woensdag gesê.
Die verdagtes is Dinsdag in Mankweng in hegtenis geneem en sal teregstaanop die moord op Ephraim Mashiane, 54, 'n direkteur in die provinsie se departement van ekonomiese ontwikkeling, toerisme en die omgewing, het brig. Hangwani Mulaudzi gesê.
Mashiane het verlede jaar op 1 September vermis geraak. Die verbrande wrak van sy motor is later in Ga-Mothapo, ongeveer 35 km oos van Polokwane, gevind.
Sy lyk is 'n maand ná sy verdwyning gevind waar dit in die Schoonoord-dam in Sekhukhune, ongeveer 150 km van die oorspronklike misdaadtoneel, gedryf het. Hy het verskeie steekwonde gehad. Hy is vermoedelik gekaap en toe doodgesteek.
Die vier, 'n 16-jarige, twee 19-jariges en 'n man van 20, sal na verwagting Donderdag in die Mankweng-landdroshof verskyn op aanklagte van ontvoering, kaping en moord.
Die motief vir die moord is steeds onbekend.
– Volg Nuus24 op Twitter.
- SAPA
