Video: Meisies laat vuiste by skool klap
2011-08-27 08:03
Welkom. – ’n Selfoonvideo van twee skoolmeisies van die stad wat mekaar onder luide aanmoediging van maats met die vuiste bydam, het soos ’n veldbrand deur die stad versprei.
Die twee leerlinge van Goudveld-Hoërskool het op die skoolterrein, in hul skoolklere, slaags geraak. Die name van minstens een van die meisies is aan Volksblad bekend.
In die video moedig die vloekende omstanders, party met sigarette in hul hande, die meisies die hele tyd aan om mekaar te slaan. Dit is nie duidelik wat die oorsaak van die bakleiery is nie. Die donkerkopmeisie vat eers ’n teug aan ’n sigaret voordat sy die eerste hou ingekry het.
Haar blonde teenstander word deur een van die seuns nader gestamp toe sy nie gou genoeg aan die geveg begin deelneem nie.
Later het die blonde meisie bloed aan haar mond.
Verskeie video’s is deur omstanders met hul selfone van die geveg gemaak. Een van die video’s was ook op YouTube, maar is later verwyder.
Die bakleiery was glo op ’n rugbyveld by die skool wat onder leerlinge as die “rokerveld” bekend staan.
Kallie Scott, skoolhoof, sê hy is nie bewus van die video nie. “Bakleiery kom gereeld by die skool voor, soos ook by ander skole. Ek weet van twee blondekop-meisies wat vroeër die week ook baklei het.”
Hy erken dat daar dié week ’n probleem met toesig by die skool was, omdat die meeste onderwysers betrokke is by ’n musiekbly-spel wat die skool in die stad se teater aanbied.
“Sulke gedrag is egter totaal onaanvaarbaar. Dit word in ’n baie ernstige lig gesien en is ’n oortreding van die gedragskode. Die betrokkenes kan tydelik geskors word. Hulle sal saam met hulle ouers na my kantoor ontbied word.”
Dit is nie duidelik presies wanneer die video gemaak is nie. Van die inligting is dat dit dié week gebeur het, maar volgens ander inligting was dit verlede week ná die rugbywedstryd tussen die gr.11- en gr.12-leerlinge.
Scott sê hy sal Maandag volledig kommentaar lewer oor die voorval. Hy het die video die eerste keer gesien nadat Volksblad dit Vrydagmiddag vir hom gestuur het.
Volg Nuus24 op Twitter.
- Volksblad