Verwarring oor Limpopo-handboeke
2012-06-28 11:00
Johannesburg – Nie alle skole in Limpopo het teen Donderdag handboeke ontvang nie, ten spyte van die departement se bewerings dat hy sy sperdatum gehaal het, het die Suid-Afrikaanse vereniging vir skoolhoofde gesê.
“Wat bedoel hulle [die onderwysdepartement] met hul sperdatum? Selfs al het een skool nie handboeke ontvang nie is dit een te veel,” het die adjunk-president van die vereniging, Ngoako Rapaledi, gesê.
“Hulle kan nie sê hulle het hul sperdatum gehaal nie. Ek is op pad na ‘n skool waar handboeke nog afgelewer moet word. Daardie selfde vragmotor het nog aflewerings wat vanoggend gedoen moet word. Watter sperdatum?” het hy gevra.
Die departement het ‘n ooreenkoms met die regteorganisasie Section 27 gehad dat alle skole in die provinsie teen Woensdagaand handboeke sal ontvang.
Hope Mokgatlhe, woordvoerder vir die onderwysdepartement, het vroeër gesê dat alle handboeke teen Woensdagaand uit die pakstore was.
“As mense sê ons het nie ons sperdatum gehaal nie, moet hulle bewyse gee. Daar is dalk ‘n paar skole wat nog nie hul boeke ontvang het nie, aangesien daar niemand by die skool was nie, maar die boeke is daar.”
– Volg Nuus24 op Twitter
- SAPA
