Vervoer mors al vrot die paaie

2010-03-11 06:50

Rajaa Azzakani, Die Burger

Kaapstad-Die departement van vervoer het tussen 2007 en 2009 bykans R76 miljoen aan vier konferensies bestee.

Dit sluit sowat R12 miljoen aan ’n BBP-vervoerdiens in, het S’bu Ndebele, minister van vervoer, Woensdag in ’n geskrewe parlementêre antwoord gesê.

Dié geld is tussen 2007 en 2009 bestee. ’n Spesiale vergadering oor lugvaart in Afrika en die Indiese Oseaan-streek het R26,9 miljoen gekos. Die eerste konferensie van die Afrika-unie se ministers wat vir paaie verantwoordelik is, het R18,7 miljoen gekos. Die tweede AU-konferensie van ministers wat vir mariene vervoer verantwoordelik is, het R18,8 miljoen gekos. Die eerste AU-konferensie van kundiges oor spoorvervoer het net meer as R4,4 miljoen gekos.

Nou eis die DA verdere antwoorde omdat nie een van dié konferensies enige direkte voordeel vir die land ingehou het nie.

Stuart Farrow, DA-woordvoerder oor vervoer, het in ’n verklaring gesê: “Die feit bly dat ons net nie kan bekostig om voortdurend groot bedrae geld te bestee aan geleenthede wat bykans nooit ’n direkte impak op die verbetering van vervoerdienste het nie.

“Buitensporige bedrae geld is deur die departement vermors op luukse konferensies terwyl die agterstand in die padnetwerkinfastruktuur net groter word.”

Farrow het gesê hy is veral geskok oor die astronomiese bedrag wat aan die lugvaartkonferensie (van 24 tot 29 November 2008) bestee is. Dit sluit R2,4 miljoen vir die huur van die saal, R16 miljoen vir advertensies en R4,6 miljoen vir BBP-vervoer in.

Met die konferensie oor maritieme vervoer (van 12 tot 16 Oktober verlede jaar) is R1,7 miljoen bestee aan media en handelsmerke, R860 000 aan toerusting en die huur van meubels en R933 000 aan ’n skemeronthaal, uitstallings en beplanning.

“Die enorme bedrae wat bestee word aan vermaak, advertensies, luukse bankette en geskenke maak nie sin vir ’n departement wat desperaat geld soek nie. Die padnetwerk is ’n gevorderde sta­dium van verval en die instandhoudingsagterstand beloop sowat R164 miljard.”

Daar is geen aanduiding dat die konferensies enigsins iets bereik het wat die besteding van dié bykans R76 miljoen die moeite werd maak nie, het hy gesê.

“Dit lyk eerder of die regering self nie dink dié konferensies was belangrik nie omdat die minister van vervoer slegs een daarvan bygewoon het.”

- Die Burger