Verslag ‘wou hof mislei’
2010-12-09 06:39
Die Burger
Kaapstad - Hy was nie eerlik in sy verslag nie. Hy het die hof probeer mislei.
Só het adv. Dup de Bruyn SC, regsverteenwoordiger van Fred van der Vyver, gister aangevoer oor ’n verslag wat Bruce Bartholomew tydens Van der Vyver se verhoor ingedien het.
Hierin het Bartholomew nié genoem dat die wêreld se voorste kenner oor skoenafdrukke nie met hom (Bartholomew) saamstem nie.
Van der Vyver is in November 2007 onskuldig bevind aan die moord op Lotz.
Hy dagvaar nou die minister van polisie vir R46miljoen.
Bartholomew, voorheen van die polisie se provinsiale misdaadrekordsentrum, het gister in die Wes-Kaapse hooggeregshof getuig hy het ’n positiewe identifikasie gemaak dat Van der Vyver se skoen ingepas het op die bloedmerk.
Sy ondersoek was: ’n Transparant van die bloedmerk is gemaak en oor die sportskoen geplaas. Skoen en transparant is mikroskopies ontleed.
Drie wit kolletjies is op die transparant uitgewys wat gepas het oor sandkorreltjies in die skoensool.
Bartholomew het sy mening met plaaslike kundiges bespreek. Hulle het nie met hom saamgestem nie.
Daarby het drie deskundiges van die misdaadrekordsentrum in Pretoria ook met hom verskil. Toe hy in Junie 2006 William Bodziak, ’n internasionale spoordeskundige, in Amerika ontmoet het, was hy steeds vol vertroue oor sy mening.
Die hof het gehoor toe die proses om oorsee te gaan in ’n stadium gesloer het, het prof. Jan Lotz (Inge se pa) gesê het hy sal R20000 bydra. “Hy het aan my gesê: Dis my kind se geld. Vat jou vrou saam.”
In Amerika het Bartholomew sy mening met Bodziak gedeel.
De Bruyn het aan hom gesê: “U gaan na die wêreld se beste deskundige (Bodziak), kom terug en laat u vriend, kapt. Maritz, ’n vierde korreltjie bysit.”
Daarby het Bartholomew ook nie die feit genoem dat Bodziak nie met sy bevindings oor die sandkorrels saamstem nie.
Regter Anton Veldhuizen het gesê: “Kan u verduidelik waarom u nie in ’n verslag genoem het dat Bodziak u nie (oor die sandkorreltjies) ondersteun nie?”
“Nee, ek kan nie verduidelik nie,” het Bartholomew geantwoord.
Volg Nuus24 op Twitter.
- Die Burger