Verslag oor weermag se verval skokkend
2009-11-21 09:08
Pieter du Toit
Kaapstad - Die departement van verdediging het gister vir die eerste keer erken die weermag is die afgelope dekade verwaarloos.
Dié bekentenis volg op ’n skokverslag wat die tussentydse militêre dienskommissie (MDK) aan dr. Lindiwe Sisulu, minister van verdediging, gestuur het. Regter Ronnie Bosielo, MDK-voorsitter, het die afgelope week aan LP’s gesê die “akute aard” van probleme in die weermag het die MDK oortuig om Sisulu te versoek om onmiddellik in te gryp.
Die voorgestelde ingryping is spesifiek daarop gemik om huisvesting te verbeter en ’n korttermyn-oplossing vir weermanne se skraps salarisse te vind.
Die kanse daarvoor lyk egter nie goed nie en dit is selfs te betwyfel of lekkende dakke, stukkende toilette en gebreekte beddens op militêre basisse binnekort herstel gaan word.
Luidens ’n verklaring deur die departement is daar “gesprekvoering” tussen die sekretaris van verdediging en die direkteur-generaal in die departement van openbare werke om te sien hoe die verbetering van soldate se verblyfkwartiere op basisse landwyd bespoedig kan word.
Ndivhuwo Mabaya, Sisulu se woordvoerder, het by navraag verduidelik die MDK se voorlopige aanbevelings sal eers oorweeg word wanneer ’n finale verslag in Desember voltooi is.
Mnyami Booi (ANC), voorsitter van die parlementêre portefeuljekomitee oor verdediging, het op sy beurt gesê enige ingryping sal moet wag tot nadat die MDK se verslag bespreek is.
Die DA het gevra dat Sisulu die voorlopige aanbevelings bekend maak en aandui watter ingrypings sy beoog. “Die MDK se onthullings is skokkend. Die werklike vraag is egter hoe dit moontlik is dat dinge só kon versleg en wie daarvoor verantwoordelik gehou moet word,” het David Maynier, DA-woordvoerder oor verdediging, gesê.
Bosielo het Woensdag aan LP’s gesê die weermag sit met sy hande in die hare omdat dié departement nie in staat is om herstelwerk en opgradering te doen nie. Die departement het R900 miljoen vir dié take beskikbaar gestel, maar moet dit volgens protokol deur openbare werke kanaliseer.
Die MDK het bevind sommige soldate het nie beddens om op te slaap nie. Toilette en storte werk nie en plafonne stort ineen.
– Die Burger