Verslag oor korrupsie, wanbestuur maak opslae

2013-02-26 09:38

Kaapstad – Grootskaalse korrupsie en wanbestuur is beklemtoon in 'n hoogs geheime verslag oor die departement van vroue, kinders en gestremdes, het Beeld Dinsdag berig.

Besonderhede uit die verslag het aan die lig gekom kort ná Lulu Xingwana, minister van die departement, in die spervuur was vir die aankoop van miljoene rande se luukse kantoormeubels vir haar hoofkantoor.

Moontlike regstappe kan die departement in die gesig staar ná bevindings dat die departement amptenare sonder kwalifikasies in senior poste aangestel het. Van dié amptenare het selfs misdaadrekords gehad.

Die verslag werp die lig op onder andere die gevalle van 'n amptenaar wat R180 000 vir oortyd betaal is, ’n basiese verpleër wat aangestel is as 'n direkteur, en vriende wat bevoordeel en in direkteursposte aangestel is bo kandidate met beter kwalifikasies.

Beeld het berig dat hy in besit is van die geheime verslag wat ná ’n ondersoek opgestel is. Xingwana het die verslag glo self aangevra en wil dit nou nie aan LP’s bekend maak nie.

Cornelius Monama, departementele woordvoerder, het gesê tugstappe het begin en van dié amptenare is reeds tydelik met betaling geskors.

– Lees hier meer.

– Volg Nuus24 op Twitter.