Verslag: behoefte aan tolkdienste by US
2010-10-02 11:44
Die Burger
Stellenbosch - Daar is ’n behoefte aan ’n tolkdiens vir studente aan die Universiteit Stellenbosch (US).
Dít blyk uit ’n verslag oor die terugvoering van sommige Engelssprekende ingenieurstudente wat nie met Afrikaans alleen die mas opkom nie.
Die studente is oor die diens gepols ná ’n proeflopie wat sedert 20September op die US-kampus gedoen is. Tydens die proeflopie het afgevaardigdes van die Noordwes-universiteit (NWU) – in opdrag van die US se ingenieursdepartement – ’n tolkdiens aan studente gelewer.
Prof. Marlene Verhoef, hoof van die NWU se taaldirektoraat, het aan Die Burger gesê: “Ons praat eintlik al sedert einde Julie met die US.”
Prof. Maarten Kamper van die ingenieursfakulteit het finale reëlings vir die tolkdiens vir hierdie semester getref, aldusVerhoef.
Johan Blaauw, hoof van taalbestuursdienste van die NWU, het bevestig die direktoraat was afgevaardigdes vir die loodsprojek lank voordat die Universiteitsraad van Stellenbosch die mosie goedgekeur het.
“Ek was saam met ons tolkdiensbestuurder, Annelise Beukes, en een van die tolke, Phillip Meintjies – wat by Potch (NWU) ingenieurswese tolk – om die projek by die US te kom demonstreer.”
Blaauw het ’n volledige verslag opgestel oor die week lange proeflopie wat op 20 September begin het.
Volgens die verslag is tolking (met sekere oorkombare voorbehoude) ’n aanvaarbare opsie vir gebruikers sowel as niegebruikers, en is die diens positief deur ingenieurstudente ontvang.
Verder is daar ’n onmiddellike behoefte aan tolkdienste.
Die betrokke dosente het ook gesê tolking is aanvaarbaar, en het loodsprojekte aanbeveel.
- Volg Nuus24 op Twitter.
- Die Burger