Verpleër afgedank ná hy glo pasiënt verkrag
2012-02-03 12:07
Johannesburg – ‘n Verpleër wat glo ‘n depressielyer in ‘n hospitaal in Potchefstroom verkrag het, is afgedank, het owerhede Vrydag gesê.
“Die morele waardes van ons samelewing verval,” het Magome Masike, die LUR vir gesondheid, aan SABC-radionuus gesê.
“Ons het deur ‘n dissiplinêre proses gegaan waar die man skuldig bevind en afgedank is.”
Die 24-jarige man sal op 16 Februarie in die Potchefstroom-landdroshof verskyn, het die Noordwes se polisiewoordvoerder brig. Thulani Ngubane gesê.
“Die pasiënt is in die hospitaal opgeneem vir depressie. Sy het in ‘n televisiekamer gesit toe sy deur die verpleër na die linnekamer geneem is,” het Ngubane gesê.
“Volgens die inligting wat ontvang is, het die slagoffer die verdagte gevolg, aangesien sy gedink het hy roep haar vir medikasie. Daar word beweer dat die verdagte die slagoffer met medikasie bedwelm het voordat hy haar verkrag het.”
Die beweerde verkragting het op 19 Januarie plaasgevind.
“Die verdagte het rubberhandskoene tydens die verkragting gebruik en het dit in die asblik weggegooi,” het Ngubane gesê.
Die vrou het die verkragting by owerhede van die hospitaal aangemeld.
Die verdagte het op 21 Januarie vir die eerste keer in die hof verskyn en is op borgtog van R1 000 vrygelaat.
‘n Verpleër van ‘n hospitaal in Bloemfontein het verlede maand in die hof verskyn op ‘n aanklag dat hy ‘n kankerpasiënt verkrag het. Die vrou is intussen dood.
– Volg Nuus24 op Twitter
- SAPA