Verpleegsters vlug ná skiet-dreigement
2010-09-29 14:00
Kaapstad - Verpleegsters het by ‘n landelike kliniek in die Flagstaff-gebied in Transkei gevlug nadat die vriend van ‘n HIV-positiewe vrou gedreig het om hulle te skiet, het die Oos-Kaapse gesondheidsdepartement Woensdag gesê.
Die woordvoerder, Sizwe Kupelo, het gesê die voorval het Maandag plaasgevind.
Die vrou, wat voorheen positief getoets is, het vir nog ‘n toets by die kliniek gegaan en het dieselfde resultaat gekry.
Haar vriend is later na die kliniek en het gedreig om die verpleegsters te skiet.
“Die kliniek moes toemaak omdat die verpleegsters weggehardloop het,” het Kupelo gesê.
“Die streekbestuurder probeer die kwessie hanteer.”
Kupelo het gesê dit is moontlik dat die vrou vir nog ‘n toets gegaan het omdat sy deur ‘n sangoma gesê is haar siekte is genees.
- Volg Nuus24 op Twitter
- SAPA