Vermoorde man het vrou glo mishandel, hoor hof
2013-02-18 12:33
Johannesburg – 'n Vrou wat van die moord op haar man beskuldig word, het in die Middelburg-landdroshof gesê hy het haar en haar kinders gereeld mishandel.
Ronell Botma doen aansoek om borgtog in die saak waarin sy aangekla word van die moord op haar man, Tizi Ciciliato.
Botma het verlede week saam met haar huiswerker, Annah Mokwana (51), dié se suster, Bule Dinah Mokwana (45), Mbuso Khoza (29), Hendrik Chego (29), Doctor Jacob Tlou (30) en Tsietsi Letsebe (34) in dié hof verskyn. Die saak is tot Maandag uitgestel, berig Beeld.
Dié sewe staan tereg op aanklagte van moord, sameswering tot moord, roof met verswarende omstandighede en regsverydeling.
Ciciliato is twee weke gelede in sy huis in dié dorp vermoor. Hy is met ’n mes gesteek en met ’n hamer oor die kop geslaan.
Josef van Eeden, Botma se prokureur, het ’n psigiatriese verslag oor Botma in die hof voorgelees.
In dié verslag, deur prof. Vollie Spies van die Universiteit van Pretoria, het sy Botma vroeër in die week geëvalueer.
Sy sê Botma en Ciciliato het sedert 1993 saam gewoon. Twee jaar later het die verhouding se dinamika verander en het Ciciliato haar erg emosioneel, verbaal en fisiek begin mishandel.
“Sy mag geen besluite geneem het nie en hy het haar begin isoleer. Hy het haar finansies ingeperk en haar verbied om buite gesinsverband te sosialiseer.”
Luidens die verslag het Ciciliato reëls in die huis neergelê wat sonder teëstribbeling gehoorsaam moes word.
Hy het Botma ook glo verskeie kere gewurg, haar kop teen die muur gestamp, haar aan haar hare rondgeruk en beledig.
Luidens die verslag wou Botma sowat vier tot vyf jaar gelede die verhouding beëindig, maar Ciciliato het haar glo met die dood gedreig.
– Volg Nuus24 op Twitter
- SAPA
