Vermoorde driejarige wou lofkleuter word
2010-12-05 06:26
Rapport
Die driejarige meisie wat koelbloedig saam met haar ouers op hul plaas in die Lindley-distrik in die Vrystaat vermoor is, wou graag een van die gospelsanger Jan de Wet se “lofkleuters” wees.
Willemien Potgieter kon ure lank luister na die liedjies wat De Wet saam met kinders sing en het dan saamgesing.
Sy sou dan daarna op haar ouma se skoot klim en vra wanneer kan sý eendag saam met “oom Jan de Wet” sing.
Die Potgieter-gesin is Woensdag op hul plaas, Tweefontein, aangeval en vermoor. Volgens die polisie is Attie Potgieter (40) buite die huis oorval en sy vrou, Wilna (36), in die huis in teregstellingstyl in die agterkop geskiet. Die moordenaars het Willemien glo ook só in die buitekamer doodgeskiet.
Bokkie van Staden, Willemien se ouma, sê die familie is baie seer en verbitterd.
“Sy was so klein. Vir wat? Wilna-hulle was so jonk en het bykans sewe jaar gesukkel om swanger te raak met Willemientjie. Óns is gedaan.”
Van Staden sê Willemien was ’n kosbare mensie en álmal wou met haar speel.
“Ek is so dankbaar dat ons haar gehad het en ook met ander kon deel. Al was dit kort.”
Pinkie Craven, Vrystaat Landbou se veiligheidsverteenwoordiger in die Oos-Vrystaat, sê: “Die polisie het wel verdagtes in hegtenis geneem, maar dit sal nie die Potgieters terugbring nie.
“Die boeregemeenskap is baie ongelukkig, verbitterd en verslae oor die barbaarse manier waarop die gesin vermoor is. Dit was ’n gawe, eerbiedige gesin en ons was almal lief vir klein Willemien.”
André Botha, Agri SA se voorsitter oor landelike beveiliging, het die moord betreur en gesê plaasmoorde in Suid-Afrika is ’n gevaar vir voedselsekerheid.
“Hulle (die vermeende moordenaars) het nie net onskuldige mense vermoor nie, maar nóg ’n hand afgekap wat Suid-Afrika van kos voorsien. Dié misdadigers doen afbreuk aan stabiliteit en vooruitgang.”
Die polisie het met die hulp van Vrystaat Landbou se intelligensiediens ses mans in hegtenis geneem.
Kol. Motantsi Makhele, polisiewoordvoerder, sê drie van die mans is werkers op die Potgieters se plaas.
“Drie is op Tweefontein in hegtenis geneem en die ander drie in die nabye woonbuurt. Hulle is tussen 17 en sowat 40 jaar oud en verskyn Maandag in die Lindley-landdroshof.”
Die Potgieter-gesin word Donderdag om 11:00 vanuit die NG kerk op Lindley begrawe.
- Rapport