Vermiste tieners met hul gesinne herenig
2011-08-22 08:55
Bloemfontein - Trane van blydskap het die naweek in die Heidedalse polisiekantoor oor twee ma’s se wange geloop nadat hul vermiste dogters opgespoor is, enkele ure nadat ’n berig in Volksblad verskyn het.
Bessie Smith en Koba van Rooi, die ma’s van onderskeidelik Evodia Arends (16) en Raquel Louw (19), kon Sondag nie ophou om hul verligting en dankbaarheid uit te spreek dat hulle hul dogters ná drie weke van slapelose nagte weer kon vashou nie.
“Dit was oorweldigend. Dit was net die Here se genade dat niks met hulle gebeur het nie,” sê van Rooi.
Sy sê die dogters praat nie veel oor hul “verdwyning” nie en ook nie oor waar hulle was nie.
Al wat die ma’s in die stadium weet, is dat hul dogters weggeloop het, en in ’n stadium selfs Johannesburg toe was.
Hulle beweer hulle het in die tyd by verskillende “vriende” gebly.
’n Anonieme leser was Saterdag in die Bloemfonteinse middestad toe hy twee meisies op Hoffmanplein sien sit het.
“Hulle het vir my net soos die meisies van Heidedal gelyk waaroor ek die oggend in Volksblad gelees het, maar ek het eers weer na my koerant gaan kyk. Daarna was ek seker dit móét hulle wees.”
Die meisies het drie sakke, insluitend hul handsakke, by hulle gehad.
Die leser het die private speurder, Leon Rossouw, gebel. Rossouw se nommer het onderaan die berig verskyn.
Rossouw het met die hulp van die man die meisies na die Heidedalse polisiekantoor gebring.
Van daar het hulle die meisies se ma’s gebel.
Van Rooi sê hulle is nou in kontak met ’n maatskaplike werker.
“’n Mens lees elke dag in die koerante van die verskriklike goed wat gebeur, die dwelmnetwerke. Ek het vir die Here gevra, waar het ek as ma gefaal?
“As ma is ek ook nie volmaak nie. Toe my kind weg was, het ek gevoel soos ’n mislukking.”
Smith sê sy kan nie ophou dankie sê nie.
“Ek kan net vir die Here sê dankie dat hulle lewe. Ek kan nie my blydskap verwoord nie. Evodia het gesê ek moet haar vergewe. Ek kan aan niemand beskryf hoe seer, hoe bitter seer dit was nie. Dankie...”
Volg Nuus24 op Twitter.
- Volksblad