Vermiste skoolmeisie se lyk glo op plaas gevind
2011-10-12 22:56
Johannesburg – Die lyk van ‘n ontvoerde skoolmeisie van Roodepoort is Woensdagmiddag op ‘n plaas in Magaliesburg gevind.
Die Gautengse onderwysdepartement het skok en medelye uitgespreek.
“Ons stuur ons diepste medelye aan die familie en wens hulle sterkte toe tydens hierdie baie moeilike tyd,” het Charles Phahlane, woordvoerder, gesê.
Hy het gesê die departement het verneem die erg verbrande lyk was dié van die 17-jarige Louise de Waal van die Hoërskool Die Burger.
Die Gautengse polisie wou egter nie spekuleer of die lyk wel dié van die ontvoerde skoolmeisie is nie.
“Ons kan nie bevestig dat dit die vermiste tiener se lyk is totdat die DNS-toetse terugkom ná toetse nie,” het lt. kol. Tshisikhawe Ndou gesê.
Hy het gesê die lyk, wat só erg gebrand is dat die persoon nie uitgeken kan word nie – is deur ‘n boer ontdek, wat rook op sy plaas gesien en ondersoek ingestel het.
Volgens Ndou is ‘n grey Toyota Hilux-bakkie, wat die beskrywing pas van die motor wat gebruik is om die tiener Woensdagoggend te ontvoer, verlate by ‘n huis in Florida, Roodepoort, gevind.
Niemand is nog in hegtenis geneem nie.
‘n Man het die meisie Woensdagoggend ontvoer toe sy op pad skool toe was in Roodepoort aan die Wes-Rand.
‘n Bakkie het omstreeks 07:00 afgetrek langs twee meisies op die hoek van Rina- en Hermanstraat in White Ridge.
“’n Man het uitgeklim en die tiener beveel om in die voertuig te klim. Toe sy geweier het, het hy ‘n vuurwapen op haar gerig totdat sy ingegee het,” het Ndou gesê.
Die ander meisie het weggehardloop terwyl die bakkie met haar vriendin weggejaag het. Die meisies was albei leerlinge van die Hoërskool Die Burger.
Volgens Ndou is die man vermoedelik tussen 20 en 30 jaar oud en het hy bruin hare. Die vermiste meisie het ‘n rooi en swart romp en ‘n swart trui met ‘n geel kraag aangehad.
Die ondersoek duur voort.
Lees hier meer.
- Volg Nuus24 op Twitter
- SAPA