Vermiste baba 'n jaar later opgespoor

2012-10-15 13:02

Johannesburg – ‘n Vrou is in Katkop in die Oos-Kaap in hegtenis geneem nadat sy ‘n baba ontvoer het, het die polisie in Katlehong gesê.

“Ons het aanvanklik inligting gekry oor ‘n baba wat by ‘n vrou in Thokoza bly, maar sy het gevlug toe sy hoor die polisie is op soek na haar,” het kapt. Mega Ndobe gesê.

Die driejarige meisie is in Augustus verlede jaar ontvoer terwyl sy by haar ouers in hul huis in Edenpark, suid van Johannesburg, geslaap het.

“Ons het verlede week gehoor dieselfde vrou was in die Tsolo-gebied in die Oos-Kaap en die Katkop-polisie is ontbied om haar aan te keer,” het Ndobe gesê.

Die vrou is die naweek na Gauteng geneem en sal binnekort in die Palm Ridge-landdroshof verskyn.

Die baba se ouers is in kennis gestel, maar die kind word nog by ‘n veilige plek gehou terwyl die ondersoek na haar verdwyning voortduur.

Volg Nuus24 op Twitter 

- SAPA