Vermeende renosterstroper doodgeskiet
2012-11-12 10:27
Johannesburg – Die Valke het Sondag 'n vermeende renosterstroper in 'n skietgeveg in die Krugerwildtuin doodgeskiet en sy makker gewond, het 'n woordvoerder gesê.
Kapt. Paul Ramoloka het gesê die Valke, in samewering met 'n taakmag, het inligting ontvang oor vermeende stropers wat omstreeks 14:00 naby die Sabi Sand- privaat natuurreservaat, wat aan die Krugerwildtuin grens, gesien is.
"Toe ons span die vier mans konfronteer, het 'n skietgeveg tussen hulle en die polisie ontstaan. Een van die stropers is dood, nog een is in die hospitaal en twee ander is in hegtenis geneem."
Die polisie het beslag gelê op 'n jaggeweer, byl, saag en 'n sedan wat deur die vermeende stropers gebruik is.
Ramoloka het gesê die drie mans sal teregstaan op aanklagte van poging tot moord en die besit van gevaarlike wapens.
"Ons probeer nog die verdagtes verbind met die stropery wat die afgelope week in die Krugerwildtuin plaasgevind het."
Volgens Sanparke het die land sedert die begin van 2012 altesaam 528 renosters verloor. 'n Totaal van 320 van dié renosters is in die Krugerwildtuin doodgemaak.
– Volg Nuus24 op Twitter
- SAPA
