Vermeende reeks-verkragter in Limpopo vas

2013-02-11 16:49

Johannesburg – ‘n Man wat glo ‘n reeksverkragter in die Thohoyandou-gebied is, is in hegtenis geneem, het die polisie in Limpopo Maandag gesê.

Die 30-jarige man is Vrydag aangekeer, het brig. Hangwani Mulaudzi gesê.

Agt meisies het verkragtings in die gebied aangemeld. Vier van hulle het die man as hul aanvaller geïdentifiseer.

Volgens Mulaudzi het DNS-toetste die man met al agt sake verbind.

“Die verdagte het in 2011 met die verkragtings begin en het dieselfde modus operandi gebruik. Hy sou in die bosse lê en dan die meisies aanval. Sy slagoffers was meisies tussen die ouderdom van 14 en 19,” het Mulaudzi gesê.

Die verkragter het soms meisies verkrag wat saam met hul kêrels in die gebied stap.

Hy sou die seuns eers vasbind voordat hy die meisies verkrag.

Die man sal binnekort in die hof verskyn.

– Volg Nuus24 op Twitter

 

- SAPA