Vermeende moordenaars sterf in skietery met polisie
2011-12-13 16:52
Johannesburg – Twee mans, wat vir moord gesoek is, is dood in ‘n skietery met die polisie by ‘n huis in Amaoti, het die polisie in KwaZulu-Natal Dinsdag gesê.
Die skietery het Maandag omstreeks 22:00 plaasgevind nadat die polisie dié huis, waarin hulle vermoed het die vermeende moordenaars wegkruip, genader het, het kol. Jay Naicker gesê.
“Die verdagtes het toe op hulle losgebrand. Die polisiebeamptes het teruggeskiet en die twee verdagtes noodlottig gewond,” het Naicker gesê.
Nog twee mans is in die skietery beseer en is na ‘n hospitaal geneem.
Agt ander mans wat in die huis was, is in hegtenis geneem.
Die polisie vermoed al 12 mans was betrokke by ‘n skietery by ‘n taverne Saterdag in Amaoti, toe ‘n groep mense op klante losgebrand het. Hulle het twee mense doodgeskiet en drie ander gewond.
Die rede vir die skietery is onbekend.
“Die verdagtes wat in hegtenis geneem is, sal teregstaan op twee aanklagte van moord, drie van poging tot moord en die besit van ongelisensieerde vuurwapens en ammunisie.”
Hulle sal eersdaags in die Ntuzuma-landdroshof verskyn, het Naicker gesê.
- Volg Nuus24 op Twitter
- SAPA