Vermeende moordenaar van ANC-leier vasgetrek
2011-09-11 17:40
Durban – ‘n Man is in hegtenis geneem in verband met die moord op Sbu Sibiya, streekshoof van die ANC in eThekwini, het die polisie gesê.
“’n Vier-en-dertig-jarige man is Vrydag in Durban se Yellowwood Park in hegtenis geneem in verband met die moord op Sibiya,” het dir. Phindile Radebe gesê.
Die man sal Maandag in die hof verskyn.
Verlede week is Zamani Sikhakhane, nog ‘n verdagte in die Sibiya-moordsaak, doodgeskiet tydens ‘n skietery met die polisie. Die eienaar van Sikhakhane se huis, Bongani Tembe, en ao. Rakesh Maharaj is ook in dié skietery dood.
Sibiya het in ‘n koeëlreën gesterf toe hy in Julie vanjaar sy huis in Inanda buite Durban binnegegaan het.
Die polisie het onlangs ‘n beloning van R50 000 beloof vir inligting wat kan lei tot die inhegtenisneming van Sibiya se moordenaars.
- Volg Nuus24 op Twitter
- SAPA