Vermeende moordenaar drink glo gif
2011-01-12 06:54
Theunissen - Die lyk van Johnny Hitchcock, verkeershoof van die dorp, wat later vanjaar vir die skietdood van sy vrou tereg sou staan, is Maandagnag in sy huis gekry.
Kapt. Stephen Thakeng, polisiewoordvoerder, het by navraag bevestig dat Hitchcock (42) omstreeks 23:00 dié aand op sy bed gekry is.
Daar bestaan twyfel oor die manier waarop Hitchcock dood is, maar Thakeng sê hy het vermoedelik gif gedrink. ’n Lykskouing word Woensdag gedoen om die oorsaak van sy dood te bepaal.
Thakeng sê ’n vriend het op Hitchcock se lyk afgekom. Die vriend het bekommerd geraak toe hy hom die hele dag nie in die hande kon kry nie.
Hy het by Hitchcock se huis deur die vensters gaan loer en hom op die bed sien lê. Hy het die deur oopgebreek en die polisie gebel.
Hitchcock is op 4 Mei verlede jaar ná die skietdood van sy vrou, Yvonne Hitchcock (39), en ’n urelange onderhandelingsdrama in hul huis op die dorp deur die polisie in verband met haar moord in hegtenis geneem.
Hy het volgens getuienis in sy borgtogaansoek aan ’n kliniese sielkundige gesê hy weet hy het “opgeneuk”, maar hy “sal sy pak slae soos ’n man vat”.
Hy is toe op borgtog van R5000 uitgelaat.
Lerina van der Westhuizen, ’n kliniese sielkundige, het in haar verslag gesê Hitchcock het aan haar gesê hy weet hy het sy toekoms weggegooi. Hy sal waarskynlik lank in die tronk sit. Hy het vrede daarmee gemaak. Daar is niks wat hy kan doen om “dit terug te draai nie”.
Die aand van die noodlottige skietery sou ’n geestelike ’n vergadering met Hitchcock en sy vrou by hul huis kom hou het. Ooggetuies sou ook teenwoordig gewees het. Dié vergadering is egter tot die volgende aand uitgestel omdat die geestelike nie daar kon wees nie.
Die een ooggetuie was wel daar en Hitchcock het ook dié ooggetuie met ’n haelgeweer probeer skiet, maar die skote het nie afgegaan nie.
Net twee doppies en die haelgeweer is agterna op die skiettoneel in die Hitchcocks se huis gekry.
Volksblad het vroeër berig dat die Hitchcock-egpaar se huweliksprobleme blykbaar geen geheim was nie en dat ’n derde party in hul huwelik die rede vir ’n erge woordewisseling was wat tot mev. Hitchcock se dood gelei het.
Die egpaar se enigste kind was tydens die voorval op 4 Mei by vriende waarheen haar pa haar kort tevore geneem het.
- Volksblad