Vermeende moordenaar deur gemeenskap doodgebrand
2012-01-23 18:03
Polokwane – ‘n Man van Thabanaswana in Sekgosese is deur lede van sy gemeenskap doodgebrand, het die polisie in Limpopo Maandag gesê.
Volgens lt. kol. Ronel Otto is die 50-jarige Enock Ramalobela Sondagaand met klippe gegooi en met stokke geslaan, waarna daar glo petrol oor hom uitgegooi en hy met ‘n motorband aan die brand gesteek is.
Hy is beskuldig van die moord op ‘n 14-jarige meisie.
Sy vrou is ook met petrol gegooi, maar is deur polisiebeamptes gered toe hulle op die toneel aankom.
Die vrou en haar drie kinders is na ‘n veilige plek geneem, het Otto gesê.
Inwoners het die polisie ook aangeval en klippe na hul voertuie gegooi, het sy bygevoeg.
Mahlatse Mendy Ramalobela se lyk is verlede week in ‘n leë huis gevind. Sy het op 10 Oktober op pad skool toe vermis geraak.
Lt. genl. Simon Mpembe, Limpopo se polisiekommissaris, het die aanval op die familie en die gevolglike moord veroordeel. Hy het lede van die gemeenskap gewaarsku dat hulle nie die wet in eie hande moet neem nie.
“Indien hulle (die gemeenskap) enige inligting het rakende misdaad wat in hul omgewing gepleeg word, word hulle aangemoedig om die plaaslike polisiestasie te kontak,” het hy gesê.
– Volg Nuus24 op Twitter
- SAPA