Vermeende sindikaat-leier vas op OR Tambo
2011-11-04 10:10
Johannesburg – ‘n Thaise man wat verbind word met ‘n internasionale renosterstroop-sindikaat is Vrydagoggend by die OR Tambo Internasionale Lughawe in hegtenis geneem, het die Suid-Afrikaanse Inkomstediens (SAID) gesê.
“Hy word by OR Tambo aangehou en ondervra deur doeane en die Valke,” het SAID-woordvoerder Adrian Lackay gesê.
Die man is tydens ‘n klopjag vasgetrek as deel van ‘n ondersoek oor die stroping en smokkel van renosterhorings na Oos-Afrika.
“Die verdagte is voorheen skuldig bevind in ‘n Suid-Afrikaanse hof nadat hy diereprodukte soos die bene van leeus gesmokkel het. Hy is ‘n boete van R10 000 opgelê, wat hy betaal het. Hy het die land daarna verlaat.”
Volgens Lackay dui die feit dat die man teruggekeer het daarop dat hy “beplan om betrokke te raak in verdere onwettige aktiwiteite”.
Hy is tussen 06:30 en 07:00 deur Suid-Afrikaanse amptenare voorgekeer toe sy vlug van Thailand geland het.
Die man is glo ‘n vennoot van die berugte stroper Chumlong Lemtongthai en dié twee is glo sleutelfigure in ‘n internasionale stroperysindikaat, het Lakay gesê.
– Volg Nuus24 op Twitter
- SAPA