Vermeende kinderdief sit in skoorsteen vas
2010-07-12 08:16
Kimberley - In ’n reddingsoperasie van vier uur lank is ’n vermeende kinderdief wat in ’n skoorsteen vasgesit het, hier gered nadat ’n deel van die skoorsteen bokant ’n kaggel in ’n deftige sitkamer steen vir steen uitgekap moes word.
Die kappery het ’n uur lank voortgeduur terwyl nuuskieriges buite gestaan en die benoude seun in die skoorsteen van hom laat hoor het – ook glo toe die nood druk.
Dit is nog nie bekend wie vir die skade gaan betaal nie.
Dié ongewone drama in Haiderweg in Riviera het Vrydag omstreeks 18:00 begin nadat twee seuns, onderskeidelik 11 en 13 jaar oud, op die huis se dak geklim en in die skoorsteen wou afklim na bewering om in te breek.
Die eienaar van die huis, Leslie Ndzilili, was nie tuis nie.
Toe die 11-jarige vassit, het die ander een se moed hom vermoedelik begewe om ook in te klim.
Dié huis het boonop ’n hoë omheining met hekke wat gesluit is. In die agterplaas is ’n kwaai hond.
Konst. Sergio Kock sê die 11-jarige het halfpad die skoorsteen af vasgesit. Sy vriend het die bure om hulp gevra.
Hy sê die bure oorkant die straat het die polisie gebel. Polisielede het van die toneel af die eienaar van die huis gebel.
Met die media se aankoms het polisielede die 13-jarige seun by hulle gehad. Hy is klein en tenger en sy gesig was met roetstrepe besmeer.
Polisielede, brandweerpersoneel en personeel van ER24 was deurentyd op die toneel.
Intussen het die gekap in die sitkamer begin. Meubels en aangrensende vertrekke was vinnig vol stof. Brandweerpersoneel het omstreeks 21:00 ’n kragopwekker gebring nadat die reddingsoperasie omstreeks 19:00 begin het.
By die skoorsteen op die dak was ook reddingspersoneel. Onder die skoorsteen in die kaggel het iemand die seun se voete gestut.
Die media is nie op die reddingstoneel in die sitkamer toegelaat nie, maar het die vordering probeer dophou wanneer die voordeur vir enkele sekondes oop- en toegemaak is.
Ndzilili, ’n wewenaar en pensioentrekker, het by sy dogter, Nomathemba Ndzilili, op Barkly-Wes gekuier toe dit gebeur het.
Sy het agterna gesê hulle moes private vervoer huur om inderhaas terug te kom Kimberley toe. Die mense wat hulle gebring het, moes toe ure lank op hulle wag.
Al hoe meer lede van die Ndzilili-familie het by die huis aangekom en kon nie glo wat aan die gebeur was nie.
Die seun in die skoorsteen se ouers was ’n rukkie lank in die sitkamer, maar het toe uitgeloop met sy ma in trane.
Buite het Nomzi Ndzilili gevra wie gaan die skade aan haar oom se huis betaal.
Om 23:00 is die seun bevry, in die sitkamer vir skok behandel en op ’n draagbaar uitgedra.
Die media kon toe ingaan. Ndzilili en familielede het in ’n stofwolk verbysterd tussen die stofbedekte meubels gestaan en hul koppe in ongeloof geskud.
Kock sê die seuns is in hegtenis geneem, maar onder die sorg van hul ouers vrygelaat. Die polisie het gereël dat maatskaplike werkers Maandag met die seuns praat.
Hy sê die polisie vermoed ouer misdadigers gebruik dié seuns om misdaad te pleeg. Die polisie sal dié moontlikheid volledig ondersoek.
Die polisie ondersoek ’n huisbraak waarvan die bedoeling onbekend is.
Die seuns verskyn binnekort in die landdroshof in Kimberley. Enigiemand met inligting oor dié gebeure kan die stad se speurders by 053-838-4100 of 10111 bel.
- Volksblad