Vermeende boelie-moordenaar in hof

2013-01-16 07:01

Johannesburg – 'n Gr.11-leerder van die Oosrand wat van die moord op 'n vermeende boelie beskuldig word, sal na verwagting Woensdag in die Boksburg-landdroshof verskyn.

Die 18-jarige Tsundzukani Mthombi is tydens sy vorige hofverskyning op 29 November borgtog van R1 000 toegestaan. Hy staan tereg op aanklagte van moord, diefstal van 'n vuurwapen en die onwettige besit van 'n vuurwapen.

Mthombi word daarvan beskuldig dat hy 'n gr.10-leerder in 'n klaskamer by die Phineas Xulu Sekondêre Skool vermoor het.

Tydens sy vorige hofverskyning het Isaac Mashishi, ondersoekbeampte, aan die hof gesê Mthombi het die kluis se sleutel uit sy ma se handsak gesteel terwyl sy wasgoed gewas het. Mthombi het na bewering die kluis oopgemaak, haar vuurwapen uitgehaal en die sleutel teruggesit.

"Hy het sy ma se vuurwapen geneem. Dit beteken hy het beplan om moord te pleeg," het Mashishi getuig.

Mashishi het gesê hy het probeer om verklarings van ander leerders te kry, maar beamptes van die skool weier om hul name en adresse te verskaf.

– Volg Nuus24 op Twitter

- SAPA