Vermeende bendelid in Reigerpark doodgeskiet

2013-01-31 08:10

Johannesburg – 'n Man is doodgeskiet en 'n tiener gewond in drie skietvoorvalle in Reigerpark naby Boksburg, het die polisie in Gauteng Donderdag gesê.

'n 42-jarige man is omstreeks 11:00 Woensdag doodgeskiet toe 'n VW Golf met drie insittendes langs sy huis stilgehou het, het sers. Mashudu Phathela, polisiewoordvoerder, gesê.

"Twee van hulle het uit die motor geklim en was betrokke in 'n vuisgeveg met die man. Hy het 'n vuurwapen uitgehaal en op hulle losgebrand. Hulle het teruggeskiet en hy is sowat 100 m van sy huis af doodgeskiet."

In die tweede voorval is 'n 16-jarige seun gewond toe hy omstreeks 19:00 dieselfde dag aangeval is.

"'n Swart VW Golf het langs hom stilgehou en op hom geskiet. Die tiener is hospitaal toe geneem."

Phathela het gesê sowat 20 m van dié toneel het die insittendes van dieselfde motor op nóg 'n man losgebrand, maar hy het weggehardloop. Dit is nie bekend of die man gewond is nie.

"Dit is moeilik om te sê of die voorvalle verband hou met bendegevegte. Die inligting wat ons van die gemeenskap ontvang het, is dat die 42-jarige man deel was van 'n bende."

Niemand is in hegtenis geneem nie.
      
– Volg Nuus24 op Twitter

- SAPA