Vermeende Kaap-dwelmbaas glo buite universiteit geskiet
2011-03-21 22:26
Johannesburg – ‘n Man wat Maandagmiddag vanaf ‘n verbygaande motorfiets in Bellville, Kaapstad, op straat doodgeskiet is, is vermoedelik die vermeende dwelmbaas Cyril Beeka.
Die polisie wou egter nie die identiteit van die 49-jarige man wat op Modderdamstraat, Bellville Suid, geskiet is, bekendmaak nie.
“Ek gaan nie identiteite aankondig nie,” het kapt. Joe Wilson Maandagaand kort na 21:00 op die toneel gesê.
Volgens die polisiebeampte was twee mans besig om wes te ry in ‘n silwer BMW toe ‘n persoon op ‘n motorfiets langs hulle ingetrek het naby die ingang na die Universiteit van die Wes-Kaap.
Die motorfietsryer het verskeie skote op die motor gevuur.
“Die bestuurder het beheer oor die voertuig verloor,” aldus Wilson.
Die voertuig het in ‘n heining buite die universiteit ingejaag.
Volgens Wilson is die bestuurder van die motor in ‘n ernstige toestand in die hospitaal.
Hy is in sy bolyf gewond, maar die polisie wou nie bevestig hoeveel skote hy toegedien is of na watter hospitaal hy geneem is nie.
Die 49-jarige passasier is op die toneel dood.
Na vermoede was hy die berugte Kaapse dwelmbaas Cyril Beeka, ‘n sleutelfiguur agter ‘n saak rondom swendelary in die Kaapstadse nagklubwêreld en moordverdagte in ‘n 1999-hofsaak.
The Star het verlede jaar berig dat Beeka die hoofverdagte in die Lolly Jackson-moordsaak gesien het op die nag van die moord.
Die moontlikheid van ‘n geteikende sluipmoordaanval op die insittendes van die BMW word ondersoek, maar volgens die polisie is daar nie in die stadium genoeg bewyse om die motief agter die voorval te bevestig nie.
Beeka word glo ook verbind met die Nasionale Intelligensie-agentskap en was eens ‘n informant vir Umkhonto we Sizwe.
Volg Nuus24 op Twitter.
- SAPA