Verkragter nou raadslid
2011-06-23 07:06
Jagersfontein – ’n Klagte is by die Onafhanklike Verkiesingskommissie (OVK) ingedien oor ’n veroordeelde verkragter wat ná die verkiesing ’n stadsraadslid in Kopanong is.
Die 33-jarige Phindile Decius Basholo is luidens amptelike dokumente en inligting van korrektiewe dienste op 25 November 1999 vir tien jaar tronk toe gestuur weens verkragting.
In Maart 2006 is hy uit die tronk op Fauresmith, waar sy tronknaam “Terminator” was, op parool vrygelaat.
Sy parool het in 2009 verstryk.
Nou is Basholo, ’n broer van ’n vorige burgemeester op die dorp, wyle Freddie Basholo, ’n stadsraadslid.
In die munisipale verkiesing het hy as ’n onafhanklike wykskandidaat op die dorp gestaan en sy wyk gewen.
Hieroor is die VF+ behoorlik die josie in.
Omdat hy ’n misdaad gepleeg en tronkstraf van langer as ’n jaar sonder die keuse van ’n boete opgelê is, was hy nie veronderstel om in die verkiesing te staan nie en moet hy nie ’n stadsraadslid wees nie. Die Grondwet verbied dit.
Jan van Niekerk, LW van die VF+, het ’n klagte by die OVK in die provinsie en by die kantoor van die land se hoofkiesbeampte, adv. Pansy Tlakula, ingedien.
Chris Mepha, Vrystaatse OVK-hoof, sê die klagte is aan die OVK se regsdepartement oorhandig. Die regsafdeling ondersoek nog die saak.
Oor die amptelike klagte dat hy nie in die stadsraad hoort nie, omdat hy weens verkragting in die tronk was, wil Basholo niks sê nie.
“Ek kan nie kommentaar lewer op die aantygings wat teen my gemaak is nie. Die mens wat dit beter as ek kan doen, is dié een wat vir julle die inligting gegee het. Ek gaan nie verduidelik nie.”
’n Jaar voordat Basholo weens verkragting tronk toe gestuur is, het sy burgemeestersbroer hier op die dorp uitgevaar oor verdraagsaamheid teenoor misdadigers.
Dit was oor ’n voorval waarin ’n verkragter op borgtog ’n tweede vrou verkrag het.
Volg Nuus24 op Twitter
- Volksblad