Verkragter kom dien straf in SA uit
2011-01-15 06:40
’n Switserse man wat langer as ’n dekade sy tronkstraf in Suid-Afrika ontduik het, is gister op die O.R. Tambo-lughawe in Kempton Park deur polisiebeamptes ingewag nadat hy deur Nieu-Seeland uitgelewer is.
Kol. McIntosh Polela, polisiewoordvoerder, sê Hans Joachim Klaar (48) is op 11 Desember 1998 in die hooggeregshof in Pietermaritzburg tot ses jaar tronkstraf gevonnis weens die verkragting van ’n vrou in Durban.
Klaar het op 17 Augustus 1999 teen die vonnis geappelleer waarna drie jaar van die vonnis vir vyf jaar opgeskort is.
Hy moes dus drie jaar van sy vonnis uitdien en is beveel om hom op 28 September 1999 aan die staat te oorhandig.
“Klaar het op sy seiljag uit die land gevlug. Die Suid-Afrikaanse owerhede het Interpol daarna om hulp gevra om Klaar op te spoor,” het Polela gesê.
Hy is op 14 Desember 2009 deur die Nieu-Seelandse immigrasiepolisie onderskep toe hy met sy seiljag by Opua, North-land, die land ingekom het.
Volgens Polela is Interpol se kantore in Pretoria in kennis gestel en het hulle gevra hy moet aangehou word hangende sy uitlewering aan Suid-Afrika.
“Voorlopige uitleweringsdokumente is na Nieu-Seeland gestuur, gevolg deur die formele uitleweringsaansoek saamgestel deur die kantoor van die direkteur van openbare vervolging in Pietermaritzburg.
“Klaar het in aanhouding gebly hangende die uitleweringsondersoek,” het Polela gesê.
Op 8 September verlede jaar het landdros E.M. Aitkan van die Auckland-distrikshof bevind Klaar is reg om aan Suid-Afrika uitgelewer te word.
Hy het op humanitêre gronde, veral oor die toestand van gevangenisse in Suid-Afrika, teen die besluit geappelleer.
Hy het later sy appèl teruggetrek.
“Ons is onseker of hy nou die volle ses jaar gaan uitdien en/of daar nog ander strafregtelike aanklagte teen hom ondersoek gaan word omdat hy uit die land gevlug het,” het Polela
gesê.
Hy kon nie bevestig waar Klaar die afgelope dekade weggekruip het nie.
- Volg Nuus24 op Twitter
- Beeld