'Verkragter' byt meisie (9) se oor af
2009-10-07 08:23
Johannesburg - 'n Man sal binnekort in die hof verskyn nadat hy glo 'n meisie verkrag en 'n stukkie van haar oor afgebyt toe sy om hulp geskree het.
Kapt. Vincent Pandarum, 'n polisiewoordvoerder, het Dinsdag gesê die gr. 4 meisie is verlede Donderdag in Esperanza naby Umzinto "brutaal" verkrag.
"Die meisie en haar twee niggies het vir 'n familielid by 'n taxistaanplek gewag. Die kaal man het hulle genader waarna hulle gehardloop het. Die man het die kinders agternagesit en hy het een van die meisies gevang."
Pandarum het gesê die man het die meisie na 'n bos gesleep waar hy haar glo verkrag het.
"Terwyl die man haar verkrag het, het sy gehoor hoe haar ma roep. Sy het probeer reageer, maar die man het haar mond toegehou met sy hand. Die meisie het sy hand gebyt en haar ma geroep. Die man het haar toe in haar gesig en haar oor gebyt voor hy gevlug het."
Die meisie het bytmerke aan haar gesig opgedoen en 'n gedeelte van haar regteroor is afgebyt.
Pandarum het gesê die man het by 'n familielid in die Oos-Kaap se huis weggekruip en is Sondag in hegtenis geneem.
"Die meisie sal binnekort plastiese chirurgie ondergaan om haar verminkte oor te herstel."
Hy het gesê speurders ondersoek die moontlikheid dat die verdagte dalk aan ander aanvalle en verkragtings in die gebied verbind kan word.
Die man sal Woensdag in die hof verskyn.
– Sapa