Verkragte vrou wend haar tot minister
2010-03-01 07:19
Eugene Gunning
George - ’n Vrou van Plettenbergbaai wat na bewering deur twee SAPD-lede van Knysna meer as drie weke gelede verkrag is, het Nathi Mthethwa, minister van polisie, en Bheki Cele, die nasionale kommissaris van polisie, gevra om in te gryp sodat die saak opgelos kan word.
Sy beskou hulle as haar enigste hoop.
Dit het gister ook aan die lig gekom dat die saak nou deur die Onafhanklike klagtedirektoraat (OKD) ondersoek word en nie meer deur die SAPD nie.
Na bewering was twee SAPD-lede van Knysna in die voorval op Saterdag 6 Februarie betrokke.
In ’n roerende brief wat die 32-jarige eienaar van ’n gastehuis aan Mthethwa en Cele geskryf het, pleit sy vir optrede teen verkragtings en korrupsie sodat die skuldiges aan die pen kan ry.
Dit is nie net ter wille van haarself nie, maar ook vir alle ander slagoffers van verkragtings en korrupsie.
Franz Fischer, haar regsverteenwoordiger, het ’n afskrif van die brief aan Die Burger beskikbaar gestel.
Hy het gister gesê die OKD het die saak oorgeneem.
Kapt. Malcolm Pojie, polisiewoordvoerder in die Suid-Kaap, het by navraag bevestig dat die OKD dit hanteer.
Na verneem word sal die ondersoek van vandag deur die OKD in alle erns voortgesit word.
In die brief skryf die vrou sy is erg getraumatiseer deur die voorval en vrees vir haar lewe.
Die voorval het ook ’n invloed op haar familie en veral haar 12-jarige dogter.
As gevolg van die voorval het sy en haar familie die Suid-Kaap verlaat en skuiling gaan soek by ’n onbekende bestemming.
Dit wil voorkom of SAPD-lede van Knysna weet wie die verdagtes is, maar niemand is bereid om na vore te kom nie, skryf sy. Hulle is klaarblyklik opdrag gee om nie oor die voorval te praat nie.
Polisievoertuie wat die aand van die voorval gebruik is om na haar te soek, het opspoortoerusting en dit behoort dus nie te moeilik te wees om vas te stel watter voertuie in die gebied was toe die voorval plaasgevind het nie.
Volgens haar inligting is van die SAPD-lede wat oor die voorval ondervra is, te bang om daaroor te praat.
Sy het ook vrae oor die uitkenningsparade wat ’n paar dae ná die voorval gehou is. Sy beskou verrigtinge daarvan as onwettig.
Sy voer ook aan SAPD-lede in Knysna beskerm hul kollegas.
Senior offisiere weet wie die verdagtes is, maar laat hulle toe om in diens te bly.
Van die senior offisiere het aangedui dat hulle weet wie die skuldiges is, maar hulle kan nie praat nie omdat hulle gedreig is.
Sedert die voorval het sy nog geen beduidende terugvoering van die SAPD oor die vordering van die saak ontvang nie.
Sy het geen respek of vertroue in die SAPD en die staatsondersoek nie.
- Die Burger