Verkragsaak teen sakeman teruggetrek
2011-03-08 08:48
Kimberley - ’n Verkragtingsaak van meer as 42 jaar gelede is Maandag hier in die landdroshof teen ’n prominente 79-jarige sakeman van die stad teruggetrek.
Sover bekend was dit die oudste verkragtingsaak in die land se regsgeskiedenis, is Maandag berig.
Steven Groenewaldt, regsverteenwoordiger van die klaagster, kon slegs Maandag bevestig die klag teen die beskuldigde is laat vaar.
Nie Groenewaldt of Stoffel de Jager van de Jager-prokureurs, vir die beskuldigde, kon bevestig of ’n skikkingsooreenkoms wel bereik is nie.
Die 56-jarige klaagster van Pretoria het beweer die beskuldigde het haar verkrag toe sy 13 jaar oud was.
Hy was ’n vriend van haar familie. Ook hy mag ingevolge die Strafproseswet nie geïdentifiseer word nie.
Volgens vroeëre hofstukke het die klaagster dekades lank oor die verkragting geswyg, totdat sy self enkele jare gelede in die tronk beland het.
Dáár het sielkundiges haar die eerste keer ingelig dat sy steeds deur die beweerde verkragting getraumatiseer word en het sy besluit om ’n klag in te dien.
Die Nasionale Vervolgingsgesag wou nie vervolg nie, omdat die saak so oud is.
Sy het toe by die Noord-Kaapse hooggeregshof aansoek gedoen om magtiging om ’n private vervolging in te stel.
Dit is geweier, onder meer omdat die beskuldigde se betoog aanvaar is dat van sy getuies al dood is en dokumente vir sy verweer nie meer beskikbaar is nie. Die grondwethof het toe in 2009 haar aansoek om appél toegestaan om haar klagte in ’n strafhof te bereg.
- Volksblad