'Verkrag'-prof se rekenaar eers ontleed
2012-01-31 07:01
Pretoria – Die hofsaak teen ’n Unisa-professor wat glo twee hawelose mans kort ná Kersfees verkrag het, is Maandag in die Pretoriase streekhof uitgestel sodat die polisie sy rekenaar se sagteware kan ontleed.
Die 52-jarige man, met sy hemp tot byna teen sy ken toegeknoop, het in die openbare galery gewag totdat sy saak geroep is.
Hy is op 26 Desember by sy huis in Garsfontein gearresteer nadat ’n hawelose man glo ’n klag by die polisie gaan indien het.
Naas die verkragtingsaanklagte het die polisie ’n aanklag van korrupsie aanhangig gemaak omdat die beskuldigde hulle glo R1 200 tydens sy arrestasie aangebied het om hom te laat gaan.
Careth Ridgard, staatsaanklaer, het die hof ingelig oor die rekenaarsagteware.
’n DNS-verslag en een verklaring kort ook nog. Van die getuies is blykbaar ook soek.
Tobie Schmahl, verdedigingsprokureur, het gesê ’n bloedmonster is reeds van sy kliënt geneem.
“Die DNS is nie in dispuut nie, want daar was toestemming (tot seks).
Die staat wil moontlik besluit of die aanklagte teruggetrek gaan word, afhangend van die inligting op sy rekenaar,” het Schmahl gesê.
Die saak is tot Maart uitgestel en die beskuldigde se borgtog van R3 000 verleng.
Luidens die verklaring van sers. Avhashoni Nevhutalu, ondersoekbeampte, wat tydens die professor se borgtogaansoek ingedien is, het die een klaer moontlik net ’n klag ingedien omdat “die beskuldigde hom nie betaal het nie”.
Die professor het glo twee mans, onderskeidelik 20 en 22 jaar oud, op verskillende aande opgelaai en na sy huis geneem onder die voorwendsel dat hy vir hulle werk het.
“Hulle is glo brandewyn gegee en nadat hulle gedrink het, het die beskuldigde hulle verkrag,” het die verklaring gelui.
“Die beskuldigde onthou die voorvalle, maar nie die klaers nie. Hy sê die seks was met toestemming,” het die ondersoekbeampte gesê.
– Volg Nuus24 op Twitter
- Beeld