'Verkrag my vrou'
2012-01-04 09:42
Johannesburg – 'n Man van Modimolle (Nylstroom) het glo gisteraand drie van sy eie werknemers met ’n geweer gedwing om sy vervreemde vrou te verkrag en haar borste gedeeltelik af te sny, terwyl hy glo self hul 19-jarige seun doodgeskiet het.
Die 51-jarige man en drie van sy werknemers het na bewering omstreeks 19:00 by die vrou se huis ingebars, het brig. Hangwani Mulaudzi, woordvoerder van polisie in Limpopo, gesê.
Die vrou is hardhandig in haar kamer gedwing en op die bed vasgemaak, waarna die drie werknemers met ’n .22 gedwing is om haar te verkrag.
Volgens Mulaudzi het die vrou ook verskeie steek- en snymerke aan haar borste gehad. Dit wil voorkom asof die aanvallers besig was om haar borste te probeer afsny.
“Die geraas het die aandag van haar 19-jarige seun, ’n student aan die Universiteit van Pretoria, getrek.
“Toe hy by die kamer inloop, het (die man) hom sonder uitlokking met die .22 in die kop geskiet. Hy is op die toneel dood gevind.”
Die pa het daarna gevlug.
“Hy is steeds gewapen en die rigting waarin hy gevlug het is onseker.”
Die polisie is op soek na die man, wat laas in ’n wit Toyota Fortuner met die registrasienommer DCS 392 FS gesien is.
Die drie werknemers het ook gevlug en niemand is nog aangekeer nie.
Enigeen met inligting moet kol. Mabisela Mohale by 082 565 8606 bel.
– Volg Nuus24 op Twitter
- Beeld