Verkoolde lyke gevind ná vliegongeluk in WK

2013-01-10 10:07

Kaapstad – Twee mense het gesterf toe ‘n ligte vliegtuig vroegoggend naby Klipheuwel in die Wes-Kaap neergestort het, het paramedici gesê.

Vanessa Jackson van ER24 sê die vliegtuig het by ‘n private vliegveld geval toe die vlieënier die landing wou uitvoer.

Paramedici en reddingswerkers sê die wrak, wat naby die R304 geleë was, was aan die brand toe hulle by die toneel opgedaag het.

Jackson sê die insittendes se oorskot was reeds verkool toe paramedici die pasiënte te hulp wou snel.

Die pasiënte is op die toneel dood verklaar.

Volgens die woordvoerder word die oorsaak van die ongeluk deur plaaslike owerhede ondersoek.

Geen verdere besonderhede is verskaf nie.

Volg Nuus24 op Twitter

- Nuus24