Verkeersman gevang weens veediefstal
2010-12-28 07:40
Beeld
Johannesburg - ’n Munisipale verkeersbeampte van KwaMahlanga, Mpumalanga, is op Kersdag gearresteer nadat hy glo boere se vee gesteel het.
’n Boer het gesê daar is die afgelope maand sowat 2 000 beeste van boere in die omgewing gesteel.
’n Man wat glo vir die verkeersbeampte gewerk het en die vee vir hom gesteel het, het die boere genader en van die verkeersbeampte se beweerde skelmstreke vertel nadat dié hom glo nie wou betaal nie.
Die boere, wat uit vrees vir viktimisering nie hul name genoem wil hê nie, het die bewerings opgevolg en afgekom op vee wat hy op ’n plaas in die Verena-gebied aanhou. ’n Plaaswerker op dié plaas het bevestig dat dit die plaas is waar die verkeersbeampte die beeste aanhou.
Die boer het gesê hulle koop beeste teen tot R6 000 aan, maar wanneer dit gesteel word, word dit teen R2 500 verkoop.
“Die verkeersbeampte sit sy brandmerk oor dié van die regte eienaar en maak dan asof die bees syne is. Toe hy gearresteer is, het die polisie hom gevra hoe hy kan bewys dat dit sy beeste is. Hy kon geen bewys toon dat hy die beeste gekoop het nie,” het die boer gesê.
Volgens ’n plaaswerker op die verkeersbeampte se plaas gebruik hy die plaas die afgelope vyf jaar om gesteelde beeste aan te hou.
Die verkeersbeampte word in die Bronkhorstspruit-polisiekantoor aangehou. Kapt. Sipho Zulu, polisiewoordvoerder, het die arrestasie bevestig.