Verkeersbeampte vas oor omkoopgeld

2012-11-13 16:41

Durban – ‘n Verkeersbeampte is in hegtenis geneem na sy glo omkoopgeld van ‘n bestuurder van 'n minibustaxi aanvaar het, het die KwaZulu-Natalse polisie gesê.

Die 44-jarige vrou is Maandag in hegtenis geneem, het kapt Thulani Zwane gesê.

Die verkeersbeampte het glo op 31 Oktober die bestuurder afgetrek vir ‘n roetine ondersoek.

“Sy taxi is deursoek en daar was foute met die voertuig. Die bestuurder is ‘n boete van R600 opgelê,” het Zwane gesê.

Die verkeersbeampte het daarna op die voertuig beslag gelê. Die beampte het eers R1 000 geëis om die voertuig te oorhandig, maar die bestuurder kon net R300 bekostig.

Zwane sê hulle het daarna ooreengekom dat die bestuurder die uitstaande bedrag later kon betaal.

Die bestuurder het die voorval by die polisie gerapporteer, en die beampte is in hegtenis geneem.

Die polisie het R700 kontant, ID-boeke, paspoorte, taxi-permitte en ou boetes in die beampte se voertuig gevind.

Die beampte is van korrupsie aangekla en sal Woensdag in die hof verskyn.

– Volg Nuus24 op Twitter
 

- SAPA