Verkeersbeampte in sop oor omkoopgeld
2009-11-04 10:51
Mafikeng - ‘n Beampte van die Verkeersdepartement in Noordwes, Collin Molusi (35), is in hegtenis geneem nadat dit aan die lig gekom het dat hy vragmotorbestuurders glo uitgebuit het.
Volgens supt. Kebaakae Metsi, polisiewoordvoerder, het Molusi glo oor ‘n sekere tydperk, vragmotors afgetrek en die bestuurders vir omkoopgeld gevra.
Die vragmotors het brandstof vanaf Suid-Afrika na Botswana vervoer. Molusi het hulle glo keer op keer afgetrek, na die weegbrug geneem en laat opdok omdat hulle glo oorlaai was.
Die vervoermaatskappy in Botswana het die polisie in Suid-Afrika van die gebeure in kennis gestel.
Met die hulp van Mafikeng se georganiseerde misdaadeenheid is Molusi op 2 November vasgetrek toe hy weereens sowat R750 omkoopgeld van ‘n vragmotorbestuurder aanvaar het.
Hy het op 3 November in die hof verskyn en is nie borgtog toegestaan nie. Hy sal weer op 5 November in die hof verskyn.
–Nuus24