Verkeerde lyk na begrafnis geneem

2013-02-01 12:13

Kaapstad – 'n Kaapse man was getraumatiseer nadat hy die kis by sy vrou se begrafnis oopgemaak en 'n vreemdeling se lyk daarin gevind het, is Vrydag berig.

"Ek het my vrou se kis oopgemaak en sy het nie reg gelyk nie. Ek het onmiddellik geweet wat is fout," het Michael Galant aan die Daily Voice gesê.

"My dogter het na my toe gekom en gesê: 'Dit is nie mammie nie', toe het ek geweet daar is 'n groot fout."

Magdalene Galant (58) het Saterdag weens 'n hartaanval gesterf.

Haar dogter,  Leota Lakay, het aan die koerant gesê die begrafnisondernemers kon nie verduidelik hoe die lyke omgeruil is nie en het haar eers probeer oortuig dat hulle die regte lyk gebring het.

Sy het gesê die maatskappy het later erken dat hulle die verkeerde lyk by die lykshuis uitgehaal het.

Die Galant-familie het probeer om die begrafnisdiens te kanselleer, maar die ondernemers het hulle oorreed om voort te gaan. Die familie is later na die lykshuis vervoer, waar Magdalene se lyk aan hulle gewys is.

Volgens die koerant het die maatskappy om verskoning gevra en onderneem om te help met 'n tweede begrafnis.
      
– Volg Nuus24 op Twitter

- SAPA