'Verkeerde' inligting oor Zuma se huis gegee
2011-10-21 12:10
Kaapstad – Die departement van openbare werke ondersoek hoekom "verkeerde inligting" aan die parlement verskaf is oor opknappingswerk wat aan die presidensiële woning in Pretoria gedoen gaan word.
Mandla Mabuza, waarnemende direkteur-generaal van openbare werke, het Vrydag in 'n verklaring gesê dit is "baie absurd en belaglik dat 'n joernalis feitelik verkeerde inligting" oor opknappingswerk aan presidensiële wonings gepubliseer het.
"Ek wil dit op rekord stel dat daar geen opknappingswerk van R170 miljoen aan die president se woning gedoen gaan word nie," het hy gesê.
"Dit is nonsens. Ek het gevra dat 'n ondersoek onmiddellik gedoen moet word om vas te stel hoekom verkeerde inligting aan die parlement gegee is. Ek soek binne 48 uur antwoorde."
Gwen Mahlangu-Nkabinde, minister van openbare werke, het Donderdag gesê die beplande opknappingswerk is in Maart vanjaar gekanselleer.
The Star het vroeër berig dat binnenshuise opknappings aan Zuma se ampswoning in Pretoria na verwagting R170 miljoen gaan kos.
Dié besonderhede is vervat in ’n geskrewe parlementêre antwoord van Mahlangu-Nkabinde op vrae van Athol Trollip, die DA se parlementêre leier.
Benewens opknappingswerk aan houtrame, balkonne, trappe, vuurherde en kandelare by dié ampswoning, word ’n nuwe aantrekkamer en sauna ook gebou.
Nuwe baddens en toilette word verskaf en die huis sal toegerus word met omvattende energiebesparingstoestelle, waaronder sonkrag-waterverhitters.
Die totale waarde van die opknappingswerk, bouwerk en ander werk wat reeds op Zuma se kantore, ampswonings in Kaapstad en Pretoria gedoen is, sowel as projekte op die Bryntirion-landgoed in Pretoria, beloop meer as R400 miljoen.
Mahlangu-Nkabinde het in haar verklaring gesê geen werk is gedoen nie, en belastingbetalers se geld is nie bestee nie.
"In Maart vanjaar toe ek die voorgestelde koste van die opknappingswerk sien, het ek gesê dit is te hoog en gevra dat dit nie voortgaan nie."
– Volg Nuus24 op Twitter
- SAPA