Verkeerde boeke by skool vir blindes afgelewer

2012-07-25 10:02

Johannesburg – Leerders by ‘n skool blindes in Limpopo het handboeke ontvang wat bedoel is vir siende leerlinge, in plaas van Braille-boeke, het ‘n berig Woensdag gesê.

Pakke handboeke wat vir siende leerlinge bedoel is, is steeds by die Siloe Skool vir Blindes nadat hulle Maandag afgelewer is, het die Sowetan berig.

Die skool, wat in die Thokgwaneg- informele nedersetting naby Lebowakgomo is, het 143 leerders en maak gebruik van Braille-boeke vir onderrig.

Beamptes van die skool het aan die koerant gesê hulle het Braille-boeke bestel en het gevind dat dié wat afgelewer is gewone boeke was.

Allan Suban, woordvoerder van die departement, het aan die Sowetan gesê daar is nog geen Braille-boeke beskikbaar nie.

“Handboeke vir blindes word nog deur uitgewers aangepas. Daar is geen handboeke vir hulle op die oomblik nie.”

Hy sê die aflewering van die konvensionele boeke by Siloe was ‘n fout.

– Volg Nuus24 op Twitter

 

- SAPA