Verdeling van onderwys kos R150m
2010-10-14 06:33
Kaapstad - Die verdeling van die nasionale departement van onderwys in een vir basiese en een vir hoër onderwys het die belastingbetaler sowat R150 miljoen gekos.
Dit is Woensdag onthul toe die departement terugvoering aan die parlement moes gee oor sy jaarverslag vir die boekjaar 2009-’10.
Prof. Mary Metcalfe, direkteur-generaal van hoër onderwys, wat die bespreking oor hoër onderwys behartig het, het erken dat dié verdeling ’n negatiewe uitwerking op dienslewering gehad het en dat daar tans – veral by hoër onderwys – ernstige personeeltekorte is.
“Daar is te min hulpbronne. Ons finansiële afdeling het byvoorbeeld slegs 12 personeellede.”
Andricus van der Westhuizen, DA-LP vir hoër onderwys, wou in vraetyd weet waarom poste dan nie gevul word as daar soveel vakatures is nie.
Volgens Theuns Tredoux, finansiële hoof van die departement van hoër onderwys, het die tesourie ten tyde van die verdeling van departemente nie geld beskikbaar gestel om vakatures te vul nie.
“Dié poste sal eers die komende naweek geadverteer word omdat ons wou seker maak daar is wel geld daarvoor beskikbaar.”
Ofskoon die departement van onderwys ’n skoon ouditmening vir die huidige boekjaar ontvang het, het LP’s Woensdag hul kommer uitgespreek oor die departement se groot agterstand met infrastruktuurprojekte.
Nagenoeg R5,5 miljard is die afgelope boekjaar vir infrastruktuurprojekte bewillig en nogtans sukkel die departement om vordering te maak met die oprig van klaskamers by plattelandse skole en in informele woongebiede.
- Die Burger