Verdagtes vas wat Moslem-man glo doodslaan
2012-08-12 11:17
Johannesburg – Albei die verdagtes wat 'n Moslem-man in Magaliesburg by 'n kitskoswinkel doodgeslaan het, is deur die polisie in hegtenis geneem.
Een van die mans is Saterdagaand in Hartbeespoort in die Noordwes in hegtenis geneem, het brig. Neville Malila, woordvoerder vir die polisie, aan die koerant gesê.
Die tweede man het hom Sondagoggend aan die Magaliesburg-polisie oorgegee. Sy prokureur het hom vergesel, het Thandi Modise, premier vand ie Noordwes, in 'n verklaring gesê.
“Ons bedank ons polisie vir die spoedige inhegtenisname en kyk na ons howe waar die reg sy gang kan gaan," het Modise gesê.
Muhammad Fayaaz Kazi, 27, van Ventersdorp, en sy pa se vriend, Anser Mahmood, is Maandag by 'n Chicken Licken-winkel in Magaliesburg aangeval.
Twee Afrikaanse mans het volgens Mahmood met Kazi se baard gespot en hom beledig.
Kazi, wat Afrikaans verstaan, het die twee gekonfronteer en 'n bakleiery het begin. Beide Kazi en sy vriend is aangeval en die twee ander mans het van die toneel gevlug. Kazi het later in die Potchefstroom-hospitaal aan sy beserings beswyk.
– Volg Nuus24 op Twitter.
- SAPA
