Verdagtes mag nou 'Facebook' in tronk
2011-12-23 07:35
Pretoria – Vier vermeende Boeremaglede gesels nou vanuit die Pretoriase Lokale Gevangenis met hul families op Facebook ná ’n hofbevel wat hulle magtig om ’n 3G-modem in hul selle aan te hou en daarmee toegang tot die internet te kry.
Dr. Johan Pretorius, sy jongste broer, Wilhelm Pretorius, en twee van hul medebeskuldigdes, Adriaan van Wyk en André du Toit, het dié aansoek in die Pretoriase hooggeregshof teen die departement van korrektiewe dienste (DKD) en sy minister gebring.
Waarnemende regter Louis Vorster het in sy uitspraak gesê die aansoek is ’n regsgeskil oor die interpretasie van art. 46 van die Wet op Korrektiewe Dienste van 1998 en die maatreëls wat getref word om die gedrag en voorregte van gevangenes te beheer.
Daarvolgens mag gevangenes slegs persoonlike rekenaars gebruik vir studiedoeleindes mits dit nie die goeie orde, veiligheid en sekuriteit in die gevangenis benadeel nie. Volgens Vorster is dié vermeende Boeremaglede nie veroordeelde gevangenes nie, maar word hulle verhoorafwagtend aangehou nadat borgtog vroeër herhaaldelik aan hulle geweier is.
Die uitgangspunt is dat ’n verhoorafwagtende gevangene, sover prakties moontlik en solank dit nie die goeie orde en veiligheid van die gevangenis raak nie, geregtig is op al die regte wat hy buite die gevangenis sou kon uitoefen.
“Die standpunt is nie nuut nie. Dit is reeds so lank gelede as 1912 beslis,” het Vorster bevind.
Vorster het gesê die DKD se weiering om die vier mans toe te laat om ’n modem te gebruik, is verkeerd en berus op ’n slaafse navolging van ’n beleidstandpunt sonder om die beperking van hul basiese regte in ag te neem.
Hy het die vier mans belet om dié geriewe aan enige ander persoon vir gebruik beskikbaar te stel.
Vorster het ook gelas dat hulle hul aantekenbesonderhede en wagwoorde aan die DKD moet verskaf sodat hul kontak met die buitewêreld gemonitor kan word.
Die DKD moet die koste van die mans se aansoek betaal.
Die mans staan saam met nog 16 mans tereg op aanklagte van onder meer hoogverraad, terrorisme, sabotasie, moord, die veroorsaking van ontploffings, die onwettige besit van vuurwapens en ammunisie en poging tot moord.
Uitspraak in dié verhoor sal volgende jaar gelewer word.
– Volg Nuus24 op Twitter
- Beeld