Verdagtes jaag in boom vas
2009-09-09 21:19
Buks Viljoen
Johannesburg- Drie mense, waarvan twee verdagtes is wat skynbaar al lank in Mpumalanga deur die polisie vir hul betrokkenheid by OTM-bomme gesoek is, is in ’n ongeluk naby Nelspruit dood.
Die ongeluk het Dinsdagaand kort na 20:30 op die Plaston-pad tussen Nelspruit en Witrivier gebeur terwyl die voertuig met ses mense daarin vir ’n verkeersman weggejaag het. Twee 9mm-pistole waarvan die reeksnommer afgevyl was asook klapmusse en handskoene is na die ongeluk in die voertuig gekry.
Die vermoede bestaan dat die mense op pad was om ’n misdaad te pleeg, sê kapt. Erhard Ströh, speurtakbevelvoerder op Witrivier.
Die verkeersbeampte van die Mbombelamunisipaliteit in Nelspruit was op pad huistoe toe die Nissan Almera van agter by hom verbyjaag.
Die voertuig het erg roekeloos gery en hy het hulle agternagesit. Die bestuurder van die voortvlugtende motor het in ’n stadium beheer daaroor verloor en teen ’n boom vasgejaag.
Drie van die insittende is opslag dood. Die ander drie is met ernstige beserings in die Thema-hospitaal in Kabokweni buite Witrivier opgeneem.
Hulle word onder polisiebewaking behandel.
–Sapa