Verdagte sak voor parlement laat polisie skrik
2010-02-11 21:15
Kaapstad – ‘n Groot pers inkopiesak en ‘n paar stukkende krukke het Donderdag daartoe gelei dat die polisie voetgangers gewaarsku het om nie die 50 meter stuk van die sypaadjie voor die parlement te gebruik nie.
“Moet asseblief nie aan hierdie kant loop nie meneer,” het ‘n polisieman aan ‘n verslaggewer van Sapa gesê toe hy naby die relings in Pleinstraat voor Tuynhuis geloop het.
Op navraag oor hoekom hy nie mag nie, het die polisiebeampte geantwoord: “Omdat daar ‘n verdagte pakkie is.”
Hy het verwys na ‘n groot pers sak wat half weggesteek was in die bosse voor die parlementsgebou.
Bo-op ‘n lae muurtjie langs die sak was ‘n paar verweerde krukke.
Tien minute later het ‘n lid van die polisie se honde-eenheid ‘n groot wolfhond na die sak gelei.
Die hond het dit goed uitgeruik, polisie-amptenare het gekommunikeer oor hulle tweerigting-radio’s en minute later kon voetgangers weer soos normaal verkeer in Pleinstraat.
Lede van Kaapstad se sogenaamde “bergie”-gemeenskap gebruik gereeld die bankies in die area as beddens en stoor hulle besittings in die bosse agter die reling.
- Sapa