Verdagte pleeg selfmoord in skietery

2013-01-15 17:57

Kaapstad – 'n Vermeende misdadiger het selfmoord gepleeg en twee polisiebeamptes is gewond in 'n skietery in Kemptonpark aan die Oos-Rand.

Volgens die SABC het die voorval Dinsdag plaasgevind toe die polisie 'n verdagte voertuig van die pad probeer trek het.

Die voertuig met ongeveer agt tot tien insittendes het toe weggejaag.

Die polisie het dit agternagesit, waarna 'n skietery uitgebreek het.

Een van die polisiemanne is in sy been gewond en nog een in die hand.

Een van die verdagtes het homself geskiet toe hy besef het dat hy vasgetrek is.

Drie ander mans is in hegtenis geneem. Die ander vyf het egter daarin geslaag om te vlug.

Volg Nuus24 op Twitter.

- SAPA