Verdagte ondervra ná baba ontvoer is
2010-04-29 11:13
Maygene de Wee, Die Burger
Kaapstad - Die polisie het Woensdag bevestig ’n vrou is Dinsdag net ná 13:00 by die Parktown-stasie in Johannesburg vir ondervraging ingeneem in verband met die ontvoering van ’n baba verlede Vrydag in Mitchells Plain.
Kapt. Rewayne Muller, polisiewoordvoerder in Mitchells Plain, het gesê die vermoede bestaan dat dié vrou die persoon is wat die baba in Mitchells Plain ontvoer het.
Die baba, wat nog nie ’n naam het nie, is Vrydag ontvoer nadat haar ma, Zukiswa Sikuni (31), die vorige dag omstreeks 06:45 aan haar die lewe geskenk het.
Sikuni, van die informele nedersetting Samora Machel, en haar dogter is Donderdag omstreeks 12:00 uit die Mitchells Plain-daghospitaal ontslaan. Sy en haar kind is Vrydag terug na die hospitaal vir ’n opvolgbesoek.
Sy het in die wagkamer langs ’n onbekende vrou gesit wat aangebied het om haar te help om haar baba reg in haar kombers toe te draai.
Ná die besoek was die onbekende vrou steeds in die wagkamer.
Sy het aangebied om die baba te help dra.
Terwyl hulle na die Mitchells Plain-taxistaanplek geloop het, het die vrou R10 uitgehaal en vir Sikuni gevra om vir haar ’n koeldrank by een van die stalletjies te koop.
Toe sy terugkom, was die vrou en die baba skoonveld.
Sikuni het toe die voorval by die Mitchells Plain-polisie aangemeld.
Muller het gesê die ondersoek is sensitief en hy mag geen verdere inligting bekend maak nie.
Hy het wel bevestig dat die vrou en die kind na Kaapstad gebring gaan word.
Daar moet nog ’n uitkenningsparade gehou word en DNS-toetse moet gedoen word om vas te stel of die baba wel Sikuni se kind is.
Lt.genl. Jeremy Vearey, groepspolisiehoof in Mitchells Plain, het gister gesê dit was deeglike speurwerk deur ’n groep toegewyde speurders.
Hy het gesê hy is veral trots op die ondersoekspan na vermiste kinders en op die hulp van die gemeenskap.