Verdagte bagasie op Zuma-vlug
2010-06-15 06:17
Erika Gibson, Beeld
Pretoria - Bagasie sonder ’n baas het onlangs op pres. Jacob Zuma se oorsese reis na Frankryk en Indië op sy vliegtuig beland.
Na verneem word, was die vliegtuig reeds met die vertrek uit Frankryk swaar met bagasie gelaai.
Toe die vrag in Indië egter vóór sy vertrek terug Suid-Afrika toe gelaai word, was dit heeltemal te swaar.
Daar was glo ook vrae oor van die bagasie wat in die vliegtuig agtergebly het terwyl Zuma en sy geselskap met húl bagasie in Indië vort is.
Die kaptein van die Inkwazi Boeing-besigheidstraler, die lugmagvliegtuig wat vir amptelike reise deur Zuma gebruik word, het glo versoek dat die passasiers hul bagasie moet eien.
Daar het toe ’n paar tasse sonder baas agtergebly. By nadere ondersoek het dit geblyk dat dit glo van Zuma se lyfwagte of die veiligheidspan se bagasie was.
Dit is nie bekend hoekom dit op Zuma se vliegtuig gelaai is terwyl dié wagte kommersieel vlieg en dusdaarop geregtig is om hul bagasie saam met hulle te neem nie.
Veiligheidskommer het ontstaan omdat niemand aanvanklik geweet het wat in die tasse is of hoe dit op die vliegtuig beland het nie.
Ingeligtes het gemeen dit kan maklik gebeur dat onwettige of onveilige goed só “gesmokkel” word om ongesiens na Suid-Afrika geneem te word.
Zuma se vliegtuig word nie aan die gewone doeane-inspeksies by die Waterkloof-lugmagbasis onderwerp nie en wat ook al in die bagasie is, kom in goeder trou as wettige bagasie in die land aan.
Die departement van verdediging het die afgelope week grootliks geswyg oor die voorval, terwyl ingeligtes gesê het die lugmagbemanning het reg opgetree deur die bagasie van die vliegtuig af te haal.
Siphiwe Dlamini, hoofwoordvoerder van die departement, het gesê hy het nog “niks ampteliks” oor die voorval gehoor nie.
’n Uitgebreide ondersoek tussen die presidensie en die lugmag is op pad om die probleem, wat glo al in die verlede ook opgeduik het, uit te stryk.
David Maynier, die DA se woordvoerder oor verdediging, het gesê die voorval kan as ’n ernstige veiligheidsheidsbreuk in die beskerming van Zuma beskou word.
- Beeld